SU DUA hari ni, Ama Jola deng Ina Feok son baku togor. Dar pagi katumu malam, dong dua basenggol sa, son tau sapa pung gar-gara.

"Woe, kalo bamara tu bukan macam bagini. Heran, laki bini ko bakalai sampe son batogor. Memangnya besong dua son bakanal ko?," Ba’i Ndu pung bini togor dia pung sodara.

Biar bagitu, Ama Jola masa bodo sa. Abis Ba’i Ndu son tau hal na, kalo dong pung sodara di Kupang Timur tu mo mati mampos gargara ciom bau busuk dar tampa yang dong bekin tahu deng tempe di bakunase sana.

"Lu ni buta ko apa. Makanya, baca... supaya lu tau kalo lu pung sodara di Bakunase tu ada susa gargara itu bau. Lu mus tau kalo dong tu su lama ciom itu barang yang ada tasiram di kali sana. Makanya..., baca... baca," Ina Feok usir dia pung ipar yang mulai dudu ko propaganda harbabiruk.

Lu tu hanya bisa bagitu sa. Datang dudu omong kosong sang lu pung sodara, abis beta kasi kopi, trus lu mangantok pulang tidor. Kalo lu pung karja laen mangkali beta dangar, ma kalo itu sa, lebe bae lu pulang te ini bau ju mekin ane ni ma, Ina Feok tolak dia pung ipar pung punggung

Ba’i Ndu yang su tau Feok pung sifat, hanya pe’e gigi sa. "Hm lu kira beta ikot na. Mo bau sampe pingsan ju beta masa bodo. Ko di beta pung ruma ko," laklaki tarek gudang garam satu batang yang bar dapa dar Dona pung adi laklaki.

Neo, kalo bagitu na bae su. Ma lu jang barani pi mandi di kali. Di itu kali tu aer pung warna su kunig sa. Ko orang mandi sampe dia pung badan bagatal samua na. Kalo lu son mo dengar, jang kas sala beta o," maitua kasi taku.

Ama Jola yang mulai panas dengar dia pung bini pung mulu, mulai tamba suara. "Bukan itu sa a’a. Ko itu aer kotong siram sayur sa mati trus mo kasi minum sapi ju sama. Itu sapi ke mancret. Makanya beta kas pinda sapi pi di huk sana. Abis sapa yang mo tanggung rasiko hanya karna itu Tahu deng tempe pung bekin. Hu... sonde memang," Ama Jola kas tarang tamba lai.

Dengar bagitu, Ba’i Ndu kapok memang. "Woe, su bagitu macam e. Ma lu su pi lapor di pemerenta ko blom. Besong dua jang bekin bodo diri. Besong dua mus pi lapor supaya pemerenta tau kalo masarakat disini ni susa ciom itu barang. Kalo bagini terus, woe lama-lama bisa paya ni ma," laklaki usul pi di Ama Jola ko lapor di kantor walikota.

"A’a e. Kalo itu tu su ulangn-ulang. Ma sampe sakarang son ada parubahan. Pamarenta dong datang ju liat sa, abis itu pulang kambali. Trus kotong disini ke dulu-dulu lai. Jujur sa, kotong su bosan omong ini barang," baitua mulai sumpa serapa.

Kalo bagini terus, lamlama beta pegang ko papoko sa. Abis ktong su omong ulang-ulang pi di itu pangusaha, ma sampe sakarang dong bekin yang sama sa. Barani sampe bulan depan dong sonde ubah, nanti dong kana. Ini batul a’a," baitua pung dara su nae.

Dengan dia pung adi su mandidi, laklaki pamit pulang. "beta son mo jadi saksi o," laklaki kabas kaen ko bangun pulang pi ruma. Maitua yang ada jerang aer ju diam sa. "Jang lupa kasi salam sang usi o," maitua kas turun pariku dar ra’o. (frans krowin)
(46. Pos Kupang - 21/05/2003)