ALEX kantara ke su bingung apa ko ini hari. Waktu mau pi skola, dia maso kambali rumah barapa kali karna sabantar lupa buku sabantar lupa bolpoin. Sampe di skola ju dia jalan ke sonde lia orang lain ko amper tabrak dia pung kawan deng guru.

"He kanapa oleng bagitu. Talalu banyak balajar mangkali ko su linglung bagitu macam," Alex pung kawan, Lina togor waktu abis apel pagi. "Batul ju, su mau ujian bagini baru beta mulai muku balajar. Mete sampe pagi baca deng karja tugas jadi beta pusing," Alex manyao.

"Kalo bagitu pasti lu su karja tugas. Bagi do. Beta ju su usaha, ma sonde bisa. Batul-batul su teto’a," Lina minta.

"Lu pung mau lai. Beta karja stenga mati lu jaga minta sa. Asal lu bagi beta lu pung tugas bahasa inggris beta mau," Alex mau babalas.

"Ho bae, ma lu jang iko sama parsis nanti ibu tau karmana, masa titik koma sama smua," Lina kasi inga.

"Gampang," abis itu dong dua babagi dong pung tugas. Jadi tugas su sonde jadi masala tapi Alex jadi pikiran lai waktu guru pengumuman minta uang ujian. Edi tau dia pung mama deng bapa sonde ada uang. Su bagitu dia pung adi parampuan bungsu ada saki ko maso ruma saki. Tapi mau karmana lai, dia harus tatap kasi tau dia pung mama karna uang ujian EBTA su sonde bisa tunda lai, dia minta izin pulang pi kasi tau dia pung mama.

"Kalo su teto’a bagini karmana lai, tarpaksa katong pi gade barang sa. Smua barang mas mama pung su gade abis. Skarang tinggal ini cincin kawin sa. Lu pi gade ko bayar uang ujian," Alex pung mama kasi kaluar cincin dari dia pung jari manis. Alex pung aer mata tadudu.

"Sonde apa-apa ana sayang. Kalo mau dapa ijasa asli memang harus susa bagini. Harus skola, ujian, karja tugas, harus bayar. Sonde apa-apa. Kalo mau enak na iko ujian persamaan sa ato beli ijasa palsu. Tapi nanti bikin soal di muka hari. Bisa maso panjara. Capat su nanti gadean tutup ini siang," Alex pung mama nasehat. Abis itu Alex langsung jalan.

Tapi ini kali ju Alex pung pikiran masi malayang ko barapa kali dia amper jato karna teto’a batu-batu di jalan yang orang ada perbaiki. Abis itu di atas bemo dia katumu deng dia pung om yang suda jadi pedagang hebat. Ini om hanya tamat SMP sa tapi su kaya. "Beta pung oto rusak ko beta nae bemo. Oto yang laen be pung bini pake pi SoE. Karmana deng lu pung skola. Ah ta usa skola susa-susa. Beta son skola ju bisa ada ruma ada oto dua. Ada tabungan. Dulu beta tamat SMP sa, itu ju ujian persamaan. (trisna dano)
(25. Pos Kupang - 14/04/2003)